Kommunikasie

Om lekker te kan gesels oor alles en nog wat is ‘n kuns wat ons die afgelope 4 maande meer van geleer het deur die KKVR kursus. Die wenke is tydloos. Maak seker julle kyk die KKVR kursus ‘n tweede keer deur. Hierdie maand fokus ons op die wanneer, waar en hoe van taai gesprekke. As julle dit reg fasiliteer gaan die hele proses sommer seepglad verloop.

In ‘n huwelik kan die regte woorde brûe bou, maar stilte bou mure.

Liezel en Nico gesels oor persepsie - wat ook soms 'n wanpersepsie is. Hoe hanteer mens dit? Om te kommunikeer sorteer soveel dinge soveel vinniger uit!

Daar is ‘n bekende voorbeeld van ‘n 9 wat op die vloer geteken is. Die man staan aan die onderkant van die 9 en sê “Dis ‘n 9”. Die vrou staan aan die bokant en sê “Dis ‘n 6”. Wie is reg? Albei! Hoe gaan hulle dit ontsyfer? Deur in mekaar se skoene te gaan staan en deur mekaar se oë te kyk. As hy omloop na haar gaan hy die 6 sien, en as sy omloop na hom gaan sy die 9 sien!

In Maand 1 het ons saamgestem met Dr. John Gottman se woorde: “Communication is the lifeline of any relationship. When couples stop talking, not only does passion diminish, but intimacy also fades away. Healthy communication is essential for maintaining emotional connection and building a strong foundation of trust and understanding in marriage."

Ons het geleer wat kwaliteit kommunikasie vir jou kan beteken; wat stap nommer een is na beter kommunikasie; wat die grootste uitdaging is en ons het ‘n wenk gedeel wat alles beter maak.

Kommunikasie klink vir my so formeel. Ek en Nico “gesels”lekker, maar as dit by ernstiger dinge kom dan “praat” ons.

Kyk net na al die voordele van goeie kommunikasie: intimiteit, passie, konneksie, sterk fondasie, vertroue, begrip, los probleme maklik op, en natuurlik liefde!